Psa 100 | CebAPD | STEP | Kamong mga katawhan sa tibuok kalibotan, panghugyaw kamo sa kalipay ngadto sa Ginoo .

Psalms 100

Awit sa Pagdayeg sa Ginoo

1 Kamong mga katawhan sa tibuok kalibotan,
panghugyaw kamo sa kalipay ngadto sa Ginoo.
2 Alagari ninyo ang Ginoo uban ang kalipay.
Duol kamo kaniya nga nagahugyaw sa pagmaya.
3 Ilha ninyo nga ang Ginoo, Dios!
Siya ang naghimo kanato ug iya kita. ^{▼▼ug iya kita: o, ug dili ang atong kaugalingon.}
Iya kitang katawhan nga giatiman niya sama sa mga karnero.
4 Sulod kamo sa iyang templo uban ang pagdayeg ug pagpasalamat.
Dayega ninyo siya ug pasalamati.
5 Kay maayo ang Ginoo;
ang iyang gugma walay kataposan,
ug ang iyang pagkamatinumanon nagapadayon hangtod sa kahangtoran.